مبقاش صعب
نقف في مكانا ونقول مفيش فايدة...طالما كل حاجة حوالينا بتقولنا خليكوا كدة
اللي علي علي وخلاص ,,
مبقاش صعب
نجرح وبسهولة كمان طالما بسهولة قوي بننجرح ومحدش بيحاول حتي يداوي او يقول اسف
مبقاش صعب
نتغرب عن بلدنا وعن اهلنا وعن نفسنا طالما كل حاجة في بلدنا رافضانا وتاعبانا
وبتروح بس للي يدفع اكتر,,
مبقاش صعب
نبكي في كل لحظة طالما الابتسامة بقت عليلة مجروحة ميتة من كتر الالم والتعب
مبقاش صعب
نقول كفاية لكل حاجة حلوة عيشناها طالما اللي عاشها معانا رافضنا
ولا حاسس حتي بحلاوتها,,,
مبقاش صعب
ننسي ماضي تعبنا فيه اشترناه لفترة,, اه ....بس خلاص اللي باع لازم يتباع
واللي جرح سهل قوي يتجرح,,
مبقاش صعب
ان الجار ياذي جاره طالما الاخلاق راحت والدين بقي صور ومناظر بس,,,
مبقاش صعب
ان الابن يهين ابوه وامه طالما البر بقي كلام في كتاب محدش بيقراه ولو قراه مش بيفهمه
ومركون علي الرفوف وبس,,,
مبقاش صعب
نفرح في حزن غيرنا ولا نراعي مشاعر حد طالما القلوب بقت حديد وكله بيقول ياللا نفسي
مبقاش صعب
اننا نودع ونقول مع السلامة لكل اللي حبيناهم طالما هما اللي اختاروا يبعدوا
واختاروا يسيبونا لوحدنا,,,,
مبقاش صعب
اننا نهون علي كل اللي اشتريناهم طالما تمنا كان رخيض قوي واحنا بس اللي غليناهم
مبقاش صعب
نتغير ونبقي حد تاني غيرنا في سرعة تزهل كل اللي يعرفونــا..
طالما الكل بيتغير وطالما كدة هنناسب العصر اكتر..!!!
مبقاش صعب اي شئ صدقوني طالما الاحساس راح
مبقاش صعب اي شئ طالما الايمان من قلوب الناس بيروح
مبقاش صعب اي شئ صدقوني
مهما كان غريب او صادم كلامي
بس صدقوني والله
والله مبقاش صعب.