ولعت يالا!!!!!!!!!!!!!!

افتكرت امبارح الأغنية بتاعة المطرب المشهور أوي سعد الصغير وهو بيقول :

ولاولاولاولاولاولاولاولاولاولاولاولاولا ولعت يالا

الكلام ده حصل لما شفت بعيني ما حدش قال لي مجلس الشورى الموقر بيولع قدام عينيه وعلى مرأى ومسمع من ملايين الشباب المصري سواء داخل مصر المحروتة أو خارجها.

الحريق كان شكله وحش أوي أوي أوي، وانا شخصياً صعب عليا "ياضنايا يابني" شكل المجلس الموقر وهو بيولع.

المهم كلام كتير أوي أوي أوي أوي عن أسباب الولعه "لا مؤاخذة الولعة يعني الحريقة مش يعني ولعة الشيشة". تعالوا معايا كده نحلل الموضوع.

افتح المعمل يابني عشان نحلل

أولاً: أحب الفت نظر سيادتكم ان مجلس الشورى تم ترميمه في سنة 2005، بتكلفة 10 أو 12 مليون جنيه "مش متذكر أوي، يعني هي هاتيجي في 2 مليون، يا سيدي ما بين الخيرين حساب" .

ثانياً: المبنى ولع في الإجازة البرلمانية، وبعد مواعيد العمل الرسمية، والنار ما ولعتش حتى ف ورقة ف مكتب السيد المحترم صفوت الشريف

Maybe لأن الراجل ده بركه بفتح الباء وربنا راضي عليه، والنار ما بتحرقش مكتب مؤمن

ألا هو مين مؤمن ده

ثالثاً: بالنسبة لرجال المطافي الموقرين، تقريباً الحكومة كانت منقية رجال المطافي كلهم من الصنف "الأحول" لأنهم كانوا بيطفوا ف المطفي امبارح وسايبين اللي والع والع

بصراحة أنا من رأيي الشخصي، الموضوع ده واخد أكبر من حجمه. يا جماعة انتوا على طول نيتكم سيئة أوي من ناحية الحكومة. كفاية بقى ما تبقوش ظلمه وجبابره كفايه

الموضوع يا جماعة بعد كام يوم. زي ما طلع الراجل بتاع حادثة الصعيد مجنون ، هايطلع برضه واحد مجنون رمى سيجارة ولع ف المبنى. وامتد اندلاع الحريق إلى وزارة الري ومبنى مجلس الشعب.

وطبعاً بقى ما فيش داعي ان الحكومة تعمل الحركات البلدي بتاعتها دي بقى وتطلع لها مليارين تلاته من دم الشعب عشان تعمل الترميم

هاتقولولي ليه يا واد يا أدباتي

هاقول لكم ان السيد صفوت الشريف "أطال الله بقاءه" قال لنا انه مستعد يصرف على عملية الترميم من جيبه الخاص

هو مش جيبه الخاص ده اللي بينه وبين جيب الشعب طريق سريع ولا انا مش واخد بالي

أما بالنسبة بقى للملفات اللي اختفت، واللي كان فيها كلام مهم أوي عن المصايب اللي عاملاها حكومتنا الموقرة، فربنا يتولاها بقى، اهي اتحرقت واتاكلت وبقت فحمة.

أما بقى بالنسبة للسؤال اللي محير الجميع، وهو ليه البرطمان، قصدي البرلمان ولع في الأجازة البرلمانية، وليه ولع بعد مواعيد العمل الرسمية.

فهاقول لكم يا جماعة قضاء وقدر. سبحان الله، ميعاده جه انه يولع.

اعترضوا بقى على النصيب يا ظلمه

وأخيراً وليس آخراً، الحمد لله ان السادة المحترمين اللي من يوم ما اتولدت وهما لسه موجودين، السيد صفوت الشريف والسيد فتحي سرور ما ولعوش

أصل يا جماعة دول تراث أكبر من تراث المبنى نفسه. ولا انتوا مش معايا

بس حابب اقول لهم حاجه.

شفتوا نار الدنيا؟؟؟

أهي دي أهون بكتير من النار اللي هاتولعوا فيها

بعد عمر طويل ان شاء الله

هههههههههههههههههههههههههههههههههههههههههه
جامد يابيجيتا اية المواضيع الجامدة دى
داخل حامى يعنى
ربنا يوفقك
تقبل مرورى

ميرسي يا امنيه علي ردك ولازم نبقي حاميين علطول

اشطه
وانا على السكينه

لا مش فاضى
اقرا كل دة
هو شكلة جامد علشان بيكلم عن الحكومة

هههههههههههههههههههههه ماشي يا هيثم

طيب يا وائل ابقى لخص الحوار وقولى علية

لا مش فاضيلك يا هيثم